తిరుప్పావై 29వ పాశురము శ్రీకృష్ణుని పట్ల సమర్పణా భావనముతో అల్లబడినది. వేకువజామునే వచ్చి ఆ స్వామిని లేపినందుకు గాను గోదాదేవి తన క్షమాపణలు చెప్పుకుంటూ తననూ, తన తోటివారినీ కూడ ఆయన రక్షించి తీరాలని పదే పదే మొర పెట్టుకోవడము జరిగింది ఈ పాశురము ద్వారా.
అంతే కాకుండా మేము ఎల్లప్పటికీ నీతో పాటు ఉండి జన్మ జన్మలకీ నీకు సేవలు చేస్తూ ఆనందించేట్లా అనుగ్రహించమని కూడా ఆయనను వేడుకుంటోంది.
తిరుప్పావై - పాశురము 29 - శిత్తుం శిఱుకాలే
శిత్తుమ్ శిఱుకాలే వందు ఉన్నయ్ శేవిత్తు, ఉన్
పొత్తామరై యడియే పోత్తుమ్ పొరుళ్ కేళాయ్
పెత్తైమ్మేయిత్తుణ్ణుమ్ కులత్తిల్ పిఱన్దు, నీ
కుత్తేవల్ ఎంగళై కొళ్ళామల్ పోగాదు ;
ఇత్తై పఱై కొళ్వాన్ అన్రుకాణ్; కోవిందా !
ఎత్తైక్కుమ్ ఏళేళు పిరవిక్కుమ్ ఉందన్నోడు
ఉత్తో మేయావోమ్, ఉనక్కే నామాళ్చెయ్ వోమ్
మత్తైనం కామంగళ్ మాత్తేలో రెమ్బావాయ్ ||
అర్థము :-
మిక్కిలి వేకువ ఝామునే లేచి వచ్చి నిన్ను సేవించి, నీ మంగళకరములైన పాదారవిందములకు మంగళాశాసనములు పాడుటయే మాకు ఆనందకరమైనది.
ఓ శ్రీకృష్ణా ! నువ్వు శ్రేష్ఠుడవైనప్పటికీ, పశువులను మేపుకొనే అజ్ఞానులమైన మా గొల్ల కులము నందు పుట్టి మా జాతినీ, మా జన్మలనూ ధన్యము చేశావు. అందుచేత నువ్వు మమ్ములను తరింపజేయక తప్పదు.
మేము అదేదో చిన్న పఱై అనే వాద్యానికోసము రాలేదు గోవిందా !
మేము ఎప్పటికీ, ఏడేడు జన్మలకీ నీతోనే ఉంటూ, నీతోనే మసలుచూ, నీకు సేవ చేయటం కోసమని వచ్చాము. మాకు ఇంక వేరే కోరికలు ఏవీ లేవు కృష్ణా !
కావున దయచేసి మమ్మల్ని ఆదుకుని ఉద్ధరించుము స్వామీ !
కామెంట్‌లు లేవు:
కామెంట్‌ను పోస్ట్ చేయండి