తిరుప్పావై - పాశురము 13 - పుళ్ళిన్ వాయ్ కీణ్డానై - Tiruppavai - Paasuram 13

తిరుప్పావై 13వ పాశురము లో తుమ్మెదల వంటి అందమైన నల్లటి నేత్ర సౌందర్యము కలిగిన ఇంకో కన్యను వ్రతము చేయడం కోసమని లేపుతూ, మిగతా వారంతా కూడ శ్రీకృష్ణుని, శ్రీరాముని యొక్క గుణ గానములు చేస్తూ తరలి పోవుచున్నారని తెలియజేస్తోంది. కాబట్టి నువ్వు కూడ వేగిరమే పద అని వేడుకుంటోంది.   

తిరుప్పావై 13వ పాశురము 

పుళ్ళిన్ వాయ్ కీణ్డానై పొల్లావరక్కనై 

క్కిళ్ళి కళైన్ దానై క్కీర్తిమై పాడి ప్పోయ్ 

పిళ్ళై గ ళెల్లారుమ్ పావై క్కళమ్ బుక్కార్,

వెళ్లి యెళున్దు వియాళ ముఱంగిత్తు;

పుళ్ళుమ్ శిలంబినకాణ్ పోదరి కణ్ణినాయ్ !

కుళ్ళ కుళిర క్కుడైన్దు నీరాడాదే

పళ్ళిక్కిడ త్తియో పావాయ్ నీ! నన్నాళాల్ 

కళ్ళం తవిరిందు కలందే లో రెమ్బావాయ్ ||   

అర్థము :-

ఓ పిల్లా! మన జట్టులోని పిల్లలంతా కూడ బకాసురిని ముక్కు చీల్చి చెండాడిన ఆ శ్రీకృష్ణుని, మరియు అదే శ్రీకృష్ణుడు శ్రీరాముని అవతారంలో ఉన్నప్పుడు, అతి సునాయాసంగా రావణుడనే రాక్షసుని తన బాణముల ద్వారా నరికి చంపిన తీరునూ,  వీరగాధలుగా కీర్తిస్తూ వ్రతము కోసము నిర్ధారించబడిన స్నానశాలకు వెళ్లిపోయారు. ఇదిగో మేము ఇద్దరు, ముగ్గురమే నిన్ను కూడా తీసుకుపోదామని, నీకోసమని వచ్చాము. 

ఇప్పటికే తెల్లవారిపోయి చాల సమయమైనది. అదిగో చూడు. తెల్లవారిందని చెప్పటానికి శుక్ర నక్షత్రము ఉదయిస్తోంది. బృహస్పతి నక్షత్రమేమో అస్తమించింది. (పక్షులు కూడ ఆహారము కోసమని బయలుదేరి తిరుగుతున్నాయి)

జింక కళ్ళ లాంటి కళ్ళు, తుమ్మెదల వంటి అందమైన, సొగసైన నేత్ర సౌందర్యాన్ని పొందినదానా! చల్లటి నీటిలో మాతో కూడి స్నానం చెయ్యకుండా ఇంకా నిద్రపోతున్నావా! (నిదురపోతున్నట్లు నటిస్తున్నావా) బాగుంది నీ చేష్ట ! ఆ కపట చర్యలు మాని వెంటనే లేచి మాతో కలిసి వ్రతము ఆచరించడానికి కదలి రా! అని ఆ ఎనిమిదో బాలికను కూడ లేపారు.