శివపార్వతుల స్తుతి స్తోత్రములు ప్రతి రోజు పూజా సమయములో టూకీగా చదువుకోడానికి ఇక్కడ తెలియజేస్తున్నాను. అర్థములు కూడా పొందుపరుస్తున్నాను.
ముందుగా పరమేశ్వరుని స్తోత్రము అటుపిమ్మట పార్వతీదేవి స్తోత్రములు ఇస్తున్నాను.
"త్రయంబకమ్" అన్న పదము శివునికి వర్తించాలని చాలా మంది యొక్క అభిప్రాయము. త్రియంబకమ్ అంటే మూడు కన్నులు కలవాడని అందరి వ్యాఖ్యానము.
కాని నా నమ్మకము ప్రకారము ఆ శ్లోకము పార్వతిమాతకు వర్తించాలని అంటాను.
త్రి అంటే మూడు లేదా ముగ్గురు అని అర్థము. అంబ అంటే అమ్మ. త్రియంబకమ్ అంటే ముగ్గురమ్మల తల్లి. ఆవిడ పరమేశ్వరి.
అందుకని నేను త్రయంబకమ్ అన్న స్తోత్రము ఇద్దరికీ ఇస్తున్నాను.
ముందుగా గణేశ స్తుతి
సర్వ విఘ్న హరమ్ దేవం
సర్వ విఘ్న వివర్జితమ్
సర్వ సిద్ధి ప్రదాతారం
వందేహం గణ నాయకమ్ ||
అర్థము :-
సమస్త విఘ్నములను, అడ్డంకులను రూపు మాపే (పోగొట్టే) దైవము; అన్ని విఘ్నములను తొలగించుచు అన్ని సిద్ధులను ప్రసాదించు (కోరికలను తీర్చు ) దైవము అయినట్టి గణనాయకునికి నా వందనములు సమర్పించుచున్నాను.
శివ స్తుతి
ఓం త్రియంబకమ్ యజామహే సుగంధిమ్ పుష్టి వర్ధనమ్
ఉర్వారుక మివ బంధనాన్ మృత్యోర్ముక్షీయ మామృతాత్ || (1)
అర్థము:-
మూడు కన్నులు కలిగిన వాడు, పరమేశ్వరుడు, ఆత్మ జ్ఞానమనే సుగంధ పరిమళములు వెదజల్లు వాడు, మన దేహములకు పుష్టిని ప్రసాదించు వాడు, అటువంటి పరిరమేశ్వరుని వేడుకుంటున్నాను. ఏ విధముగా అయితే బాగా మగ్గిపోయిన ఆనపకాయ కానీ, దోసకాయ కాని తన తీగలు అనే బంధనాన్ని తెంచుకుని రాలిపోవు విధముగా మనలను కూడా ఈ శరీర బంధనాల నుండి ముక్తిని ప్రసాదించమని.
వందే శంభుముమాపతిం సురుగురుం వందే జగత్కారణం
వందే పన్నగభూషణం మృగధరం వందే పశూనాం పతిం |
వందే సూర్యశశాంక వహ్ని నయనం వందే ముకుందప్రియం |
వందే భక్త జనాశ్రయంచ వరదం వందే శివం శంకరం || (2)
వందే పన్నగభూషణం మృగధరం వందే పశూనాం పతిం |
వందే సూర్యశశాంక వహ్ని నయనం వందే ముకుందప్రియం |
వందే భక్త జనాశ్రయంచ వరదం వందే శివం శంకరం || (2)
అర్థము:-
నమస్సులు ఓ శంభో, ఉమ అని పిలువబడే పార్వతీ నాథా! దేవతలకు గురువు, జగత్తుకు, ఈ సృష్టి కి కారణభూతుడవు, సర్పములే ఆభరణములుగా ఉండి, జింక చర్మమును ధరించు వాడవు, పశువులకు అధిపతివి అయినట్టి నీకు వందనములు.
సూర్య, చంద్రుల కాంతులతో కూడిన కన్నులు కలవాడు, ముకుందుడు అంటే విష్ణువుకి ప్రియమైన వాడు, భక్త జనులకు ఆశ్రయము, వరములను ఇచ్చునట్టి ఆహ్లాదకరమైన శంకరుడు అగు ఆ శివ పరమాత్మకు వందనములు.
వాగర్థావివ సంపృక్తౌ వాగర్థ ప్రతిపత్తయే
జగతః పితరౌ వందే పార్వతీపరమేశ్వరౌ || (3)
అర్థము :-
వాక్కు (శబ్దము) లకు సంబంధము కలిగించి, ఆ ధ్వనులకు ఒక అర్థమును ప్రతిపాదించు, సర్వ జగత్తుకి తండ్రి అయిన పార్వతీపరమేశ్వరునికి నా యొక్క నమస్సులు (వందనములు).
ఓంకారము సమస్త ధ్వనులకు మూలాధారం. ఆ ఓంకారము ద్వారా ధ్వనులను సృష్టిస్తూ ఆ ధ్వనులను వాక్కులుగా మారుస్తూ, ఆ వాక్కులకు అర్థము సృష్టిస్తున్నాడు ఆ పరమేశ్వరుడు.
అంగికం భువనం యస్య వాచికమ్ సర్వ వాఙ్మయమ్
ఆహార్యం చంద్ర తారాది తమ్ నుమ సాత్త్వికమ్ శివమ్ || (4)
అర్థము :-
ఈ భువనమునే తన వస్త్రముగా దాల్చినవాడు, తన వాచికమే (అంటే తన పలుకే) సమస్త వాఙ్మయము (సకల విజ్ఞానము) అయినవాడు, తనకు ఆహారముగా చంద్రుడు, నక్షత్రములు పొందినవాడు ( అనగా చంద్రుడు, నక్షత్రములు మొదలగునవన్నీ అతనిలోనే ఇమిడి ఉన్నాయి అని అర్థము). ఇంకొక విధముగా ఆలోచిస్తే చంద్రుడు, తారలు ఆయనకు ఆభరణములుగా కలవాడు అని కూడ అర్థము వస్తుంది. అటువంటి సాత్విక గుణ సంపన్నుడును అయిన శివ పరమాత్మునికి నా వందనములు సమర్పిస్తున్నాను.
మృత్యుంజయాయ రుద్రాయ
నీలకంఠాయ శంభవే
అమృతేశాయ శర్వాయ
శ్రీ మహాదేవతే నమః || (5)
అర్థము :-
మృత్యుంజయుడు, రుద్రుడు, నీలకంఠుడు, శంభవుడు అన్నవి శివుని నామములు. మృత్యువును జయించిన వాడు, మృత్యుదేవతని తన అధీనములో ఉంచుకున్నవాడు. రుద్రుడు ప్రళయ దేవత. చాలా భయంకరముగా, రుద్రముగా ఉండి సమస్త బ్రహ్మాండము వణకిపోయెలా చేయువాడు.
నీలకంఠుడు అంటే సముద్ర మథనములో విషపానము చేసి, తన కంఠములో దాచుకుని దేవతలను రక్షించినవాడు. శంభవుడు అంటే పవిత్రతకు, పరమానందము, ఆత్మోల్లాసము మొదలైన వాటికి నిలయమైనవాడు.
అంతేకాక శివుడు అమృత దేవత, శర్వాయ అంటే అంతటా అన్నిచోట్లా వ్యాపించిన దేవత.
అటువంటి శ్రీ మహాదేవత అయిన శివపరమాత్మకు నేను వందనములు సమర్పించుచున్నాను.
పార్వతీ స్తుతి
ఓం త్రియంబకమ్ యజామహే సుగంధిమ్ పుష్టి వర్ధనమ్
ఉర్వారుక మివ బంధనాన్ మృత్యోర్ముక్షీయ మామృతాత్ || (1)
అర్థము :-
అంబ, అంబిక, అంబికం - ఇవి మూడు వ్యుత్పత్తులు అమ్మకి. త్రి అంటే మూడు. అందుకని ముగ్గురమ్మల అమ్మ అవుతోంది ఆవిడ.
ఓ ముగ్గురమ్మల తల్లీ! లోక మాతా! జగమంతటికీ కళ్యాణము కలిగించే సుగంధముల విరజల్లుతూ, పుష్టి, పటుత్వములను ప్రసాదించు తల్లీ, మిమ్ములను భక్తి, శ్రద్ధలతో వేడుకుంటున్నాము.
ఒక పండు ఎలాగైతే మొక్క నుండి తెగిపోయి స్వేఛ్ఛని పొందుతుందో అలాగే మాకు మృత్యువు (అంటే సంసార బంధనముల) నుండి సంబంధమును తెంచి అమృతము పోలిన ముక్తిని ప్రసాదించుము తల్లీ !
మహాకాళీ మహాలక్ష్మీ మహా సారస్వతీ ప్రభా
ఇష్ట కామేశ్వరీ కుర్యాత్ విశ్వశ్రీ ర్విశ్వ మంగళమ్ || (2)
అర్థము :-
అమ్మా ! మహాకాళీ, మహాలక్ష్మీ, మహా సరస్వతీ ! ఈ ముగ్గురమ్మల ప్రభని కలిగిన తల్లీ ! మా కోరిక తీరుస్తూ విశ్వమంగళము ప్రసాదించుము. సకల ప్రాణులు మంగళకరమైన జీవనము పొందునటుల కటాక్షించుము.
షోడశీ పూర్ణ చంద్రాభా మల్లికార్జున గేహినీ
ఇష్ట కామేశ్వరీ కుర్యాత్ జగన్నీరోగ శోభనమ్ || (3)
అర్థము :-
పదహారు కళలతో ఉట్టిపడుతున్న చంద్ర కాంతి వెదజల్లుతూ, మరియు మల్లె పూవు, అర్జున పుష్పముల వంటి అందముతో కూడిన దేహము కలిగిన దేవీ ! ఓ తల్లీ ! మా కోరికలు తీరుస్తూ ఈ జగత్తును రోగాల బారి నుండి రక్షించుమా !
జగద్ధాత్రీ లోకనేత్రీ సుధా నిష్యంది సుస్మితా
ఇష్ట కామేశ్వరీ కుర్యాత్ లోకం సద్భుద్ది సుందరమ్ || (4)
అర్థము :-
జగత్తును బాధ్యతతో భరిస్తూ, లోకాలను నేత్రము వలె కనిపెట్టుకుని కాపాడుతూ ఉంటూ, అమృతాన్ని కంటికి కాటుకలాగా దాల్చిన సుందర వదనము కలిగిన తల్లీ ! మా కోరికలను తీరుస్తూ లోకులకు సద్బుద్ధి కలిగించి అందమైన లోకాన్ని ప్రసాదించుమా !
పరమేశ్వర వాల్లభ్య దివ్య సౌభాగ్య సుప్రభా
ఇష్ట కామేశ్వరీ దద్యాత్ మాంగళ్యానంద జీవనమ్ || (5)
అర్థము :-
పరమేశ్వరునితో పొందిన దివ్య సౌభాగ్యముతో ప్రకాశిస్తూ మాకు అందరికీ కూడ మంగళకరమైన ఆనందముతో కూడిన జీవితాన్ని ప్రసాదించుమా తల్లీ !
కామెంట్‌లు లేవు:
కామెంట్‌ను పోస్ట్ చేయండి